TMeLab UDAKO ESKOLAK 2025

TMeLab laborategiaren plan estrategikoaren berritze-prozesuan euskal herrigintzaren gai zentralen inguruko udako eskolak antolatzeko egitasmoa mamitu dugu. Egitasmo honen bidez, laborategian lantzen ari garen eta une honetan gako diren gai politiko, sozial eta juridikoen inguruan, ikuspegi soberanistatik abiatuta, gogoeta partekatua sustatu nahi dugu.

Udako eskola hauen helburua da soberanismoaren eragileak eta norbanakoak elkartzea, gogoeta egiteko, eztabaidatzeko eta aurrera begirako ildo estrategikoak elkarrekin fintzen joateko espazio irekia eskainiz. Helburu horien baitan, urtero gai zehatz bat hautatu eta horren inguruko hausnarketa kolektiboa egingo dugu. Aurten euskararen biziberritzeari helduko diogu.

Lehen edizio honetan, euskararen normalizazioak eta biziberritzeak eskatzen duen hizkuntza politika berriaren inguruko gogoeta izango da ardatz nagusia.
Jada asko hitz egin da azken urteetan euskararen biziberritzeak bizi duen agortze edo geldotze prozesuaz, bai eta etorkizun motzean dituen arrisku estruktural eta politikoaz ere. Nahiko zabaldua dago hizkuntza politika egokitu eta berritu baten premia, baina oraindik ez dago argitasun nahikorik zein norabide estrategikotara jo behar den.

Gainera, gogoeta hau premiazkoa bihurtzen da egungo hizkuntza politiken oinarriak pairatzen ari diren erasoaldi juridiko sistematikoaren testuinguruan. Beraz, ezinbestekoa da hau ere aztergai hartzea: nola berritu gure esparru juridiko eta politikoak euskararen biziberritzearen alde egiteko.